Nuur-Dugle (Caasimada Online) – Xildhibaan Cusmaan Xaadoole oo ku sugan deegaanadii Al-Shabaab laga xoreeyey ee gobolka Sh/Dhexe ayaa shaaciyey qorshihii suurta-geliyey in la xoreeyo degaanka Nuur-dugle, isagoo soo bandhigay go’aan halis ahaa, balse lagu faa’iiday oo Xildhibaan Yuusuf Kabaale uu ku adkeystay.
Xildhibaanka ayaa aad u amaanay beesha Kabaale Wacbuudhan ee Abgaal, isagoo shaaciyey in xoreynta deegaanada beeshaas uu sababteeda lahaa Xildhibaan Yuusuf Kabaale oo hoggaaminayey ciidankii xoreeyey Nuur-dugle iyo deegaanada u dhow.
“Maalintii aan Al-Shabaab ka xoreynay Masaajid Cali-gaduud, waxaan celi weynay Xildhibaan Yuusuf Kabaale, wuxuu na yiri aan 30 KM gudaha galno oo Nuur-Dugle aan xoreyno, waxaan dhahnay sidee isaga difaaci doonaa weerarrada Al-Shabaab, wuxuu nagu yiri beesheyda Kabaale ayaan soo kicinayaa ee mar na geeya degaanka,” ayuu yiri Xaadoole.
Wuxuu sheegay in go’aankaas lala qaatay Xildhibaan Yuusuf Kabaale, iyadoo cabsi badan la qabo oo Al-Shabaab lasoo dhex galay, balse waxaa guuleystay qorshihii xildhibaanka, maadaama ciidan xoog leh laga helay beesha Xildhibaan Yuusuf Kabaale, markii laga dul qaaday oo laga xoreeyey Al-Shabaab.
Sidoo kale Xildhibaan Xaadoole ayaa cadeeyey in xoreyntii Nuur-dugle ay u sahashay in la xoreeyey degmooyin iyo deegaanadii kale ee Sh/Dhexe ay Al-Shabaab ka joogeen, sida Aadan-Yabaal, ilaa Hiiraan iyo Galgaduud.
Xildhibaan Xaadoole ayaa ku dheeraaday ka hadalka heerka cabsidii ay qabeen dadka laga xoreeyey Al-Shabaab, isagoo ku amaanay geesinimada ay muujiyeen ciidankii is abaabulay ee beesha Kabaale oo dhul badan ka xoreeyey Al-Shabaab.
“Markii aad doorateen Yuusuf Kabaale, walee Dawac ma aadnaan doorane ogaada, Xildhibaanka isna waxaan lee yahay beel aad u fiican ayaad ka dhalatay, hadii aad aragteen ciidan inta la soo weeraray la laayey, waxay ku cusubyihiin deegaanka, balse idinka waxay idinkugu soo dhiira waayeen dhulka ayaad uga aqoon badan tihiin, hadana yaan la is dhigan,” ayuu hadalkiisa ku sii daray Xaadoole.
Xildhibaan Cusmaan Xaadoole iyo Xildhibaan Yuusuf Kabaale ayaa hoggaaminayey dagaalladii Al-Shabaab looga xoreeyey deegaanada ay Sh/Dhexe ka degaan beelaha ay ku metelaan baarlamaanka federaalka, taas oo aad loogu amaanay.
Labadaan xildhibaan oo garab ka helaya dowladda dhexe iyo madaxda ugu sareysa HirShabeelle ayaa ku guuleystay inay guud ahaan degmooyinka maamulkaas ku soo celiyaan gacanta dowladnimada, waxaana la sheegaa in Al-Shabaab ay hadda HirShabeelle uga dambeeyaan dhinaca galbeed ee wabiga Shabeelle.
Xigasho: Caasimada
