Kooxda Manchester United ayaa kusoo laaban doonta garoomada koobka kooxaha horyaallada Yurub ee Champions League xilli ciyaareedka soo socda ka dib markii ay 4-1 ku garaaceen Chelsea khamiisti si ay u xaqiijiyaan ku dhameysashada kaalinta afarta sare ee Premier League.
Casemiro, Anthony Martial, Bruno Fernandes (Rigoore) iyo Marcus Rashford ayaa u kala dhaliyay goolasha United, iyaga markii horeba u baahna hal dhibic labada kulan ee ugu dambeeyay horyaalka si ay si rasmi ah u soo afjaraan rajadii sii liidatay ee Liverpool ee ahayd inay boos ka helaan tartanka kooxaha Yurub.
“Waa muhiim, kooxdaan waxay ka tirsan tahay Champions League,” ayuu yiri tababaraha United Erik ten Hag oo la hadlay Sky Sports. “Laakiin ma fududa horyaalka Premier League, waa tartan adag, waana wax weyn marka aad gudato shaqada u soo bixitaanka Champions League” ayuu raaciyay tababre Hag.
Kooxda saddexda jeer ku guulaysatay koobka horyaalada yurub ee United oo xili ciyaareedkii hore ku guul daraystay in ay u soo baxdo champions league ayaa ku jirta kaalinta 3-aad iyaga oo leh 72 dhibcood iyada oo ay hal kulan u harsan tahay. Waxay lix dhibcood ka saraysa Liverpool oo ku jirta kaalinta shanaad.
Reuters.
Xigasho: VOA Somali
