Madaxweynaha Dowladda Federaalka Soomaaliya Mudane Maxamed Cabdullaahi Farmaajo ayaa dhambaal tacsi ah uga diray qoyska, shacabka iyo guud ahaan dowladda Imaraadka Carabta geerida ku timid, Alle ha u naxariistee, Madaxweynihii dalkaas, Mudane Sheekh Khaliifa Binu Saayid Aala Nahyaan.
“Mudane Maxamed Binu Raashid Aala Maktuum, Madaxweyne Ku-xigeenka Imaraadka Carabta, Mudane Maxamed Binu Saayid Aala Nahyaan, Dhaxal Sugaha Imaraadda Abu Dhabi, waxaan idinka, qoyska Madaxweynaha, shacabka iyo dowladda Imaraadka Carabka, la wadaagayaa murugada geerida ku timid, Alle ha u naxariistee, Sheekh Khaliifa Binu Saayid Aala Nahyaan, Madaxweynihii Dowladda Imaraadka Carabka.”
Madaxweyne Maxamed Cabdullaahi Farmaajo ayaa marxuum Alle uga baryey in uu u danbi dhaafo, kuna abaal mariyo jannooyinkiisa, isaga oo dowladda iyo guud ahaan shacabka Imaraadka Carabta u rajeeyay samir iyo iimaan.
Dhanka kale, Madaxweynaha Puntland Siciid Cabdullaahi Deni, ayaa ka tacsiyeeyay geerida Alle ha u naxariistee Madaxweynihii dalka Imaaraadka Carabta, oo maanta geeriyooday.
“Waxaan uga tacsiyeeynaya Shacabka iyo Dowladda Imaaraadka Carabta, geerida alle ha u naxariistee Madaxweynihii dalkaasi Shiikh Khaliif Bin Zayid Ala Nahyaan oo geeriyoday maanta.
Wuxuu ahaa hoggaamiye door muhim ah ku leh wadamada Islaamka iyo guud ahaan wadamada Adduunka, waxaan tacsi u dirayaa qoyskii iyo eheladii uu ka geeriyooday, marxuumka waxaan alle uga baryaya inuu janadii geeyo.
Aamiin,” Ayuu yiri Madaxweynaha Dowladda Puntland , Sidiid Cabdullaahi Deni.
Xigasho: Puntland Times
