Puntlandtimes(Muqdisho) Madaxwaynaha Jamhuuriyadda federaalka ah ee Somalia mudane Xasan Sheikh Maxamuud ayaa ka hadlay, nuxurka warmurtiyeedkii xalay kasoo baxay shirkii golaha wadatashiga qaran ee dhowrka Cishe Muqdisho uga socda Madaxda Dowladda Federaalka ah iyo Dowlad goboleedyada marka laga reebo Puntland.
Xasan oo shir jaraaid qabtay isagoo ay hareera taagan yihiin Ra’iisul wasaaraha Xukuumadda iyo madaxda dowlad goboleedyada ayaa faahfaahin ka bixiyay qodobadii kasoo baxay shirkaasi.
Qaybta hore shirkiisa jaraaid wuxuu ahaa faan iyo ka faaleynta wixii uqabsoonay sanadkii uu joogay isagoona carabaabay in Dowladiisu ay xoogga saartay Xorreynta Dalka, cafinta Deemaha lagu leeyahay somalia iyo la dagaalanka Argagaxisada.
Intaas kadib Waxa uu soo hadal qaaday waxyaabihii kasoo baxay shirkii madasha wadatashiga qaran, isagoo tilmaamay in dalka uu xalay ka guuray nidaam nuddo soo jiray, kaas oo badal ku sameeyay dhamaan nidaamyadii wax lagu dooran jiray.
Madaxwayne Xasan ayaa yiri:- “Dalka waa guuray wuxuu ka guuray nidaamyadii hore ee uu ku saleysnaan jiray, odayaal dad magacaaba ka nimiday 50 qof ayaa wax dooraneysa ayaan ka nimiday,” ayuu yiri.
Madaxwaynaha ayaa ku nuuxnuuxsaday in ay bilaabayaan qirshihii dalka oo dhan ay uga dhici lahayd doorasho qof iyo cod ah, waxaana tani ay noqon doontaa mid shacanka kusoo dooranayaan hogaankooda heer degmo ilaa heer Madaxwayne.
“Dowladaha hoose ee degmooyinka laga soo bilaano illaa madaxweynaha jamhuuriyadda lagu keeno muwaadinka Soomaaliga ah inuu doorto oo sanduuq cod ugu rido ayaan rabnaa” ayuu mar kale yiri Madaxwayne Xasan sheikh Maxamuud.
Madaxwaynaha ayaa sheegay in dalka ay ka abuurmi doonaan nidaanka xisbiyada badan, isagoona fariin u diray dadka Soomaaliyeed oo uu ugu baaqay inay cabsida iska daayaan, isla-markaana laga rabo inay dhaqaajiyaan taladooda.
“Shacabka Soomaaliyeed ayay u taallaa annaga waan billownay, iyagaa loo soo bandhigayaa baarlamaanadooda ayaa la horgeynayaa, bulshadooda rayidka meel walba ayaa looga hadlayaa, dadka Soomaaliyeed waxa ay rabaan ayaa soconaya,” ayuu sii yiri.
Doodo badan ayaa kasoo laabtay talaabadii xalay ay qaadeen Madaxda Golaha Wadatashiga qaran, waxaana la aaminsan yahay in tani tahay bilaawga weji siyaasadeed cusub oo uu dalku galay.
Puntlandtimes
Xigasho: Puntland Times
