Dadka xadaaradda ilbaxnimo ehelkeeda ah waxay madaxdooda ku doortaan manifeestada ay kuwa tartamaya shacabka usoo bandhigaan iyada oo oraah iyo qoraalba isugujira, taasoo ay si bayaan ah ugu sharraxayaan hiraalka ay dalka lahiigsanayaan iyo hannaanka dawligoodu habka uu ushaqeyn doono.
Sidii aan horeba ugu dooday, waajibku wuxuu ahaa in doorashadu shacabka salka kuhayso oo ol’olaha murashaxnimada madaxweynaha qarankana heerka dowlad goboleed lagasoo agaasimo oo shacabkana kusaleysnaado. Waxaa saxsanaa in murashax walba caasimadaha dowlad goboleedyada booqdo oo manifeestadiisa marna fagaare, marna TV-yada maxalliga ah hortooda shacabweynaha ugu kala dhigdhigo.
Kaddiibna, waxaa jira hab dawaali ah oo uu shacabku murashaxiinta ugu kala codeyn lahaa, iyada oo aan xaanshi xun iyo sanduuqa lagu ridayo midna looba baahanin. Habkaas ayaana midkasta magaalo waliba loogu codeyn lahaa oo kaddibna lagu kala dareeri lahaa, kan aqlabiyadda kasoo helayna inta Xamar la isla aado baarlamaanku toos u ansixin lahaa oo xilka madaxweynenimo loogu caleemasaari lahaa.
Isla waddamadii hannaankaas hayinka ah shacabweynaha Soomaaliyeed iskaga gudbay ayaa hannaankan xaaraamiga ah inta dalka ku laazimeen tuugadan wada rashaxanna la kalasafan oo taakuleynaya. Hadafkuna waa in Soomaalidii lahayd aysan Soomaaliya maamulan e ay waddamadaasu maamushaan oo qummaatina u kufsadaan.
Kuwiinna tuugadan dalkooda iyo dadkiisa sidan ukhiyaameynaya ee cadaawaha qalaad afka uggelinaya la kalasafan oo u kala hiilinaya ayaa ah nacasyada dalka ku noqday nacabka sokeeye ee aayahiisa kaga khamaaray. Dal dadkii lahaa dhacayaan cadow lagama dhicin karo!
Xigasho: Puntland Times
