Madaxweynaha Puntland ahna Musharrax Madaxweynaha DFS Siciid Cabdullaahi Deni, ayaa sheegay in Soomaaliya ay u baahan tahay Isbedel u horseeda meel ay istaahisho.
Siciid Deni oo qoraal soo dhigay bartiisa Facebook, ayaa hambalyo ku aadan xuska maalinta dhalinyarada Soomaaliyeed ee 15-May u diray dhalinyarada, waxaana uu ugu baaqay Xildhibaanada labada Gole ee BJFS inay codkooda siiyaan.
Hoos ka Akhriso qoraalka Siciid Cabdullaahi Deni.
Maanta waa maalin taariikhi ah,15-ka May waa aasaaskii ururkii gobonnimo doonka Soomaaliyeed ee SYL, sidoo kale maanta laga billaabo maamuuska 15-ka May wuu laba jibaarmaya, waayo maanta waxaa dalku sugaya isbedel Soomaaliya gaarsiiya meel ay istaahisho. Inshallah.
Munaasabadda 15-ka May waxaan hambalyo u diraya Dhallinyarada Soomaaliyeed, oo aynu u qorsheynay shaqo abuur iyo hirgelinta nidaamka dimuqraadiyadda oo iyaga siinaya fursad siyaasadeed oo aysan hadda haysan.
Waxaan si gaar ah hambalyo ugu diraya Xildhibaanada dhallinyarada ah ee ku jira labada Aqal ee Baarlamaanka JFS, waxaa maanta hortaalla fursad taariikhi ah oo ay dalka ugu gudbin karaan Doorasho qof iyo cod ah oo ka mid ah qorsheyaasha aan la wadaagay inaan hirgelinayo hadii aan Ku guuleysto xilka Madaxweynaha JFS.
Xigasho: Puntland Times
