May 11 (Jowhar.com)- Ra’iisul Wasaaraha UK Boris Johnson ayaa ballan qaaday inuu Sweden iyo Finland ka taageeri doono khataraha ka iman kara Ruushka kadib markii uu booqasho ku tegey dalalka Sweden iyo Finland.
Dalalka Sweden iyo Finland oo xubno ka ahayn gaashanbuurta NATO ayaa waxa ay ka fiirsanayaan hadda inay ku biiraan isbahaysigaas.
Johnson oo ay si wadajir ah shir jaraa’id u qabteen ra’iisul wasaaraha Sweden, Magdalena Andersson ayaa sheegay in nooca iyo inta ay la egtahay taageerada suurtagalka ah noqon doonto waxa ay Sweden weydiisan karto.
Waxana labada dhinac ay kala saxiixdeen heshiis amni, sidoo kale Johnson ra’iisul wasaaraha UK heshiis kale ayuu la saxiixday madaxweynaha Finland Sauli Niinistö.
Heshiisyada labada dhinac waxay ballan qaadayaan in haddii labada waddan ay la kulmaan weerar ama masiibo, ay markii ay ka codsadaan waddanka ay dhibaatadu saameysey ay midba midka kale ka caawin doonaan siyaabo kala duwan, oo ay ku jiri karaan hab militari.
Ruushka ayaa ka digay in cawaaqib xumo ay ka dhalan doonto haddii ay ku biiraan gaashaanbuurta Nato.
Laakiin labada Sweden iyo Finland oo leh taariikh dheer oo dhexdhexaadnimo dagaal waxay arkeen taageerada dadweynaha ee ku biirista Nato oo sii kordheysa tan iyo markii Ruushku weeraray Ukraine
Xigasho: Jowhar
