Wafti uu hoggaaminayo Guddoomiye kuxigeenka 2-aad ee Aqalka Sare ee BJFS, Abdullahi Ali Hersi Timacadde ayaa maanta gaaray magaalada Laascaanood ee xarunta gobalka Sool, oo uu ka soconayo muddo kabadan 40 maalmood dagaal u dhexeeya ciidamada maamulka Somaliland iyo dadka deegaanka ee SSC-KHAATUMO.
Waa waftigii ugu horeeyay ee kasocda dawladda Federaalka Soomaaliya, kaas oo muddo 15 sano ah kadib taga Laascaanood, oo uu heystay maamulka Somaliland oo sheega in uu ka go’ay Soomaaliya inteeda kale.
Guddoomiye Cabdullaahi Timacadde oo kasoo jeeda deegaanka ayaa waxaa wehlinaya xubno kasocda wasaaraddaha dawladda Faderaalka, oo qiimeynaya baaxada khasaaraha iyo baahida gargaarka arrimaha bulshada.
Waftiga ayaa kulan la qaatay Isimadda dhaqanka ee SSC, kuwaas oo ay ka wada-hadleen xaalada Laascaanood iyo siddii loo xoojin lahaa gurmadka dadkii ku barakacay dagaalka.
Gudoomiye kuxigeenka Aqalka Sare ayaa horey ugu baaqay Somaliland in ay ciidamadeeda kala baxdo gobalkan, kahor intii aysan dagaaladu dhicin.
Tagista Waftiga DFS ee Laascaanood, ayaa imaanaysa xilli maalinimadii shalay uu magaalada ka dhacay dagaalkii ugu cuslaa ee abid ka dhaca, kaas oo ay ka dhasheen khasaaro xoog leh oo dhinacyada kala gaaray, walina abaabul culus ayay wadaan labada dhinacba.
Xigasho: Puntland Times
