Mar. 18 (Jowhar.com-Wararka naga soo gaaraya gobolka Sool ayaa sheegaya in duleedk magaalada Laascaanood uu ka socdo mid kamid ah dagaaladii ugu culsaa ee waayadan ka dhacay halkaasi, wuxuuna u dhexeeyaa ciidanka Somaliland iyo dadka deegaanka ee SSC.
Inkastoo aan la xaqiijin xadiga uu gaarsiisan yahay khasaaraha, wararka hordhaca ah ee la helayo waxey tilmaanayaan in khasaare xoog leh la gaarsiiyay dhanka Somaliland, iyagoo ku jawaabay masaafiic ay ku garaaceen xaafadaha magaalada.
Sida ay xaqiijinayaan dadka deegaanka baabuur ciidan oo laga qabsaday Somaliland iyo maxaabiis dagaal ayaa sawiradooda la baahiyey, xili wali dagaalka uu socdo.
Somaliland, waxay sheegtay in dhankooda lagu soo qaaday dagaalka, ayna ka dambeeyaan Puntland iyo kooxo Argagixisa ah, waxayna sheegtay in uu ahaa weerar la diyaarinayay maalmihii u dambeeyey.
Xaaladda Laascaanood ayaa maalmihii la soo dhaafay daganeyd, waxaana guuldareystay dadaalo ay waday dowladda Itoobiya oo ay ku dooneysay iney wadahadal isugu keento labada dhinac, kadib shuruudo adag oo ay la yimaadeen dhinacyada colaada u dhexeyso
Xigasho: Jowhar
