Dadka deggan magaalada Doolow ee gobolka Gedo ayaa sheegay inay maqleen saaka dhowaqa qaraxyo ka dhacay goobta ay ku taallo xero ciidan oo ay isticmaalaan ciidamada Itoobiya.
Mid ka mid ah dadka degaanka ayaa u sheegay idaacadda VOA inuu maqlay laba qarax oo is xigxiga oo dhacay wixii ka dambeeyey 10am waqtiga Soomaaliya. Ilaa hadda ma cadda khasaaraha qaraxyadan.
Ururka Al-Shabaab ayaa sheegtay mas’uuliyadda labadan qarax, waxaana ururku sheegtay oo kale inay qaraxyadan ka dambeeyeen laba ismiidaamiye oo waday baabuur laga soo buuxiyey waxyaabaha qarxa.
Milatariga Itoobiya ayaan weli ka hadlin qaraxyadan iyo khasaaraha ka dhashay.
Hase yeeshee mas’uuliyiinta maamulka Gobolka Gedo ee garabka taageersan maamulka Jubaland ayaa sheegay in qaraxaasi uusaan gaysan khasaare.
Gudoomiye ku-xigeenka amniga iyo siyaasada Gobolka Gedo Cismaan Nuux Xaaji ayaa arimahaasi uga warramay wariyaha VOA Aadan Maxamed Salaad.
Xigasho: VOA Somali
