Daaficii hore ee Manchester City Micah Richards ayaa sharaxaad xiiso leh ka bixiyay sababta uu Tababaraha Aston Villa iyo halyeyga Liverpool Steven Gerrard uu u doonayo in ay Man City ku guulaysato horyaalka premier League maalinta ugu dambaysa xilli ciyaareedkan.
Kadib guushii 2/1 ahayd ee ay Liverpool ka gaadhay Southampton waxa ay haatan hal dhibic ka dambaysaa hogaamiyayaasha horyaalka ee Man City iyada oo lagu kala bixi doono koobka maalinta ugu dambaysa xilli ciyaareedka.
Man City ayaa gacanta ku haysa frusadeeda waxana ay u baahantahay in ay ka badiso Aston Villa si ay ugu guulaysato horyaalka premier League.
Si kasta ha ahaatee Villa waxa tababare u ah Halyeeyga Liverpool Gerrard kaas oo ay dad badan oo Liverpool ah rajaynayaan in uu caawiyo kooxdiisii hore waliba ka badiyo ama bar-baro ku qabto Man City.
Laakiin xiddigii hore ee Richards ayaa kashifay sabab kale oo uu Gerrard u doorbidi doono ama uu u doonayo in ay Man City ku guulaysato horyaalka premier League xilli ciyaareedkan.
Sababtaas ayaa ah in ay Aston Villa heshiiskii ay Jack Grealish kaga iibisay Man City ku xidhay shardi ah in ay ka hesho 15 milyan hadii uu xiddigu kula guulaysto horyaalka premier League.
“Steven Gerrard wuu jeclaan lahaa in ay Liverpool ku guulaysato horyaalka waliba uu ka badiyo Man City Axada laakiin Heshiiskii ay Aston Villa kooxda Man City kaga iibisay Jack Grealish waxa ay Villa ku xidhay shardi ay ku helayso lacag 15 milyan ah hadii uu xiddigu kula guulaysto horyaalka”ayuu yidhi.
“Sidaas darteed waxa aan aaminsanahay in uu Gerrard doorbidayo in ay City ku guulaysato horyaalka sababta oo ah lacag ayay kooxdiisu ka heli doontaa arintaas”ayuu sii raaciyay.
Xigasho: Kooxda
