Tababaraha Benfica Roger Schmidt ayaa sheegay in aanu jirin wax heshiis ah oo dhexmaray kooxdiisa Benfica iyo chelsea kuna saabsan xiddiga khadka dhexe ee Enzo Fernandez laakiin wuxuu qiray in kooxdu ay haatan ka fiirsaneyso xaalka hadii uu xiddigu ku biiro Blues.
Chelsea ayaa xoojisay dadaalka ay ku doonayso xiddiga 21 jirka ah ka hor inta uuna xidhmin suuqa kala iibsiga maalinta salaasada.
Labada kooxood ayaa wadahadalo ku jira saacadihii ugu dambeeyay iyada oo ay doonayaan in ay heshiis ka gaadhaan.
Xiddiga reer Argentina ayaa heshiiskiisa kooxda Benfica lagu bur-burin karaa lacag dhan 120 milyan oo euro waxana ay kooxda reer Portugal doonaysaa in ay hesho lacagta lagu bur-burin.
Tababaraha Benfica oo arintaas ka hadlaya ayaa yidhi”Waa in aan u diyaar garawno wax walba, gaar marka uu suuqu sii xidhmay”.
“Waan ognahay inay jirto xaalad Enzo, waxa jira lacag lagu bur-burin karo heshiiskiisa, hadii uu doonayo in uu kooxda ka tago kooxduna doonayo in ay bixiso lacagta lagu helayo”.
“Laakin waqtigaan la joogo waa ciyaaryahankeena, wax heshiis ah ma jiro, waa ciyaaryahankeena. Waan arki doonaa waxa dhaca labada maalmood ee soo socota”ayuu si raaciyay.
Xigasho: Kooxda
